தமிழ் கெழுமிய நல்லுலகில் வண்ணச்சரபம் தண்டபாணிசுவாமிகள் தனிச்சிறப்பிடம் பெற்றவர். திருநெல்வேலியில் பிறந்து தமிழ்நாடெங்கும் தேவார மூவரை ஒப்பத் தலந்தோறும் சென்று பாடிப் பரவியவர். சமயபேதங்கடந்த சமயாதீதத்தை நிறுவியவர். கௌமார நெறியின் கொள்கையை வரையறுத்து வகுத்தவர். புதிய வகை இலக்கணமும் இசைப்பாக்களும், இலக்கிய வகைகளின் பெருக்கமும் தமிழ்மொழிக்குச் சுவாமிகள் அளித்த கொடை. பெண் விடுதலையும் தேச விடுதலையும் பாடிய சமயத் துறவி. முருகதாசர், திருப்புகழ்ச்சாமி, வண்ணச்சரபர் எனப்பலவாறு போற்றப்படும் சுவாமிகளின் சமயத்தமிழ்ப் பங்களிப்பை எல்லோருக்கும் கொண்டு செல்லும் எளிய முயற்சியே இந்தத் தளம்.

இப்பணியில் எங்கள் ஆர்வத்தைத் தூண்டி வழிநடத்துபவரும் தண்டபாணி சுவாமிகளின் புகழைப் பரப்பி அவர் வழியில் சமயப் பணியாற்றி வருபவருமான சிரவையாதீன குருமகாசன்னிதானத்திற்கு எங்கள் நன்றியறிதலைத் தெரிவித்துக் கொள்கின்றோம். வண்ணச்சரபம் மரபில்வந்து சுவாமிகளின் புகழைப் பரப்பிவரும் சுவாமிகளின் கொள்ளுப்பெயரர் திருவாமாத்தூர், கௌமார மடாலயம் தி.மு.தண்டபாணி ஐயா அவர்களுக்கும் எங்கள் நன்றி உரியது.

சுவாமிகளின் இலக்கிய, இலக்கணப் பணிகளைத் தமிழன்பர்கள் கைகளில் கொண்டு சேர்க்கும் பணியில் ஈடுபட்ட எங்களை குருவருளும் தெய்வத் திருவருளும் வழிநடத்தும் என்று உளமாறக் கொண்டு இப்பணியில் ஈடுபட்டுள்ளோம். அன்பர்கள் தக்க ஆலோசனைகளை வழங்கி இப்பணியில் எமக்கு ஊக்கம் தர வேண்டுகின்றோம்.